أعتذر لاعضاء المنتدى وزواره عن انقطاعى الطويل عن الكتابة والمشاركات وها هى أولى مشاركاتى بعد طول غياب وهو مقال بعنوان " رحلة الانتظار "
كثيرا مما يعرفنى يعرف انى مؤمن بأن ذلك الشعب له رحلة طويله مع المعاناة على مر العصور المختلفة وذلك الشعب يتقلب فى بحر عميق من المعاناة ولكن مع تلك المعاناة تجد شعبا لدية قدرة نادرة على التحمل والانتظار رافعا شعار " غدا يوم أخر " دايما بنقول لبعض اكيد بكرة هيبقى احلى مع ان اوقات كتير بيجى بكرة وبيكون اسوء بكتير من انبارح .
انا مش هتكلم زيى ما اتعود معظم طلابى عن تاريخنا الطويل من المعاناة لكن انا هتكلم عن حاجه تانية خالص وهى رحلة الانتظار وبردو مش هجيب تاريخنا منذ العصور السحيقة انا هتكلم عن الانا اوعى عليه
انا اتولدت فى البلد دى لقات ليها رئيس واحد مكنتش لسه اتولدت اليوم المسك فيه الحكم لكنى اعرف الاجواء المشبوهه التى اعتلى بها عرش مصر من استفتاء مشبوة بعد اغتيال الرئيس السادات وكان الطبيعى بحكم انه كان نائب " والله يسامحك بقى يا سادات " انه يباشر اعمال رئيس الجمهورية حتى تجرى الانتخابات والتى تحولت الى استفتاء هل ترغب ان يكون محمد حسنى مبارك رئيسا لجمهورية مصر العربية ؟؟ وامامك اختيارين اما نعم - او نعم وطلعت النتيجة ساحقه حتى الاموات فى قبورهم قالوا نعم لمبارك قلنا وماله ننتظر ونشوف الراجل ده ممكن يعمل ايه جايز يغير تاريخنا الطويل مع المعاناة " جه يكحلها عماها " وكالعادة وقفنا نتفرج ونستنى ونبص حولينا ومفيش جديد قالوا يا جماعة مدة الحكم 6 سنين بس الراجل هيلحق يعمل ايه ولا ايه ادوله فرصه تانية فضلنا نبص لبعض وقلنا وماله نستنى شوية كمان فات الكتير يا ولاد مبقاش الا القليل , "الراجل عمر وطور وغير المكنش ممكن يتغير " اوعى تصدقوا د كلام الحكومة , اصلهم هما دايما كده عندهم نظرة ثاقبة بيقدروا يشوفوا الاحنا مبنشفهوش وفضلنا بردو نبص لبعض لحد ما بصانا ولقانا ضاع من عمرنا 30 سنة من الانتظار وبعد ال30 سنه بيقولوا لنا معلش اصله ملحقش فهيكمل "جمال " وياصبر ايوب .
وقامت الثورة العمرى ما شوفتها لو حتى فى منام ولو حد جه وحكى لى عنها كنت بقول د مجرد أحلام ومن يوم ما قالوا عيزين نغير النظام وكل يوم نقول لنفسنا ها سقط النظام ؟ فيقولوا لسه طب نصطبر شوية كمان والمرة دى رحلة الانتظار مش طولت زيى ما طول عمرنا متعودين قلنا معقول الحلم العمرنا ما حلمناة حصل الخيال اتجسد وبقى حقيقة طب خلاص خلصنا تاريخنا مع المعاناة قالوا لاء لسه شوية اصل لسه فاضل شوية بقايا للنظام قلنا مش مهم نستنى كمان شوية وكمان شوية على ما نقدر نرجع الاستقرار . يااااااااااا اد ايه الشعب ده صبور وكأننا من نسل النبى ايوب .
وقالوا طب نجيب حكومة مؤقته تسير الاعمال على ما تتعمل انتخابات وعبدها هيجلنا واحد يقولنا ياربت تفضلوا مستنين وهنفضل مستنين وياريت يا سامعين تكون فهمتوا انا عايز اقول ايه يعنى انا عايز اقول اننا هنفضل مستنين .